1Cor 10 | BEF | STEP | Nalalu'nigita lali tatatigi lolo hite melete hi'ahana yana'mu kehelilabe luto lenelepilugi kehelilo. Moseu Iyipi metogati enele'moto nobigo enali yege yege bona'i sopohuba ifi to epalago bi'ahana enali asaga'i hege nagami'i lite bi'ahana. Ana nagami'mofihi gi'a Safa Nagami'i yabe.

1 Corinthians 10

Faga lugefamofihi lipite agoya mehi etalo

1 Nalalu'nigita lali tatatigi lolo hite melete hi'ahana yana'mu kehelilabe luto lenelepilugi kehelilo. Moseu Iyipi metogati enele'moto nobigo enali yege yege bona'i sopohuba ifi to epalago bi'ahana enali asaga'i hege nagami'i lite bi'ahana. Ana nagami'mofihi gi'a Safa Nagami'i yabe. 2 Ya nehite Mosehi mege'i malalabe luto sopohuba to hege nagami'uba asaga'i mono nagami'i lolo higo fele'ahana. 3 To enali ka melugu nebago Sikalafu'uba kokulumaguti nose'na li huto hu epigo asaga bona'i nete mine'ahana. 4 To Sikalafu'uba efanuguti nagami'i li huto hu epigo asaga bona'i ne'ahana. To ana efahi Hu'mamofihi Sikalafu'uba li huto higo yauba enemege'i moloto bu'ehina. Ana efahi yamofihi Kilisito yabe luto yatai lali nokehelune. 5 Ya hu'ehinaya Hu'mau ana Isilaeli bona'i luga'a enali kumu foke ka meli epalago kame metoga fili su he'ahago sekuya'ani i tili tele hu'ehina.

6 To Yuta bona'i tatatimagi enalitoga nasana huto hu'ehinamofihi lali legekesa li hokolo huto huto hu'ehinamo ni'ibe. Lali ya'ma foipa nasana'mu lipoti melenogo ana suhi lolo hu lalutigi. 7 Enalitogati luga'amagi faga lugefa nasana'mu lipi emite agoya hi emite mine'ahana. Lenali ya'ma ya suhi mehilo. Yamofihi mono bukugu ya'ma fayahi ma lite keye'ahanamo ni'ibe:Bona'i enali meto minete nete nete ete ho tilete faga lugefa nasanamofihi gelo bite melekehi hi'ahana. 8 Ya hilete moko lise nasana fato fato'mofihi li huto hite mine'ahana ya suhi mehilune. Enalitogati luga'amagi ana nasanamofihi foipana li huto hite minago Hu'mau nona'a epigo ana moneko'isi yupahi moneko bona'i luga'a babu lite fili'ahana'a ya'ma 23,000 fili su he'ahana. 9 To mone yupahi hiti enalitogati luga'amagi Sipi Bo kumu komopa'a bati hina bo nohibe lite fi taga hi etago, Hu'mau enoho lifi'ehina osifa'magi heni epalago fili su he'ahana. Lali hiti ya huto Sipi Bomofihi fi taga mehu etalune'mu nohune. 10 To mone yupahi hiti enalitogati luga'amagi Hu'mamofihi bugu nefigo enoholata bo agelouba enoho'ehina. Lali hiti ya mehilune.

11 Enalitoga nasana huto hu'ehina yanauba lalitoga sipina lipoti nomalana yamofihi bu galune. Me'i hiti kokuluma hiti kana'atiti hupamone nohinagu nohune. Kaga ya'ma legekesa lite yamofihi beto hite fayahi keye'ahanamo ya'ma ni'ibe.

12 Ya hu'ehina'mu ya'ma moneuba ai'amu kehelito Hu'mamofihi kagu amuya moloto nohilina bouba buto sibina hu laligi, yamofihi legeso huto kaba huto minalibe. 13 Lenalitoga lenimi'i mololata nasanauba huto huto o henetilina ya'ma noto noto bona'i asagatoga ana suko huto hulata nohibe. Ya hu'ehinaya Hu'mau keheligo ule'ale hulata bo nohinago fi betaga hube nohina nasana moneuba huto huloto lenali amuya be ligito enele'mo felu halina'a lolo nehinogomo Hu'mau ai'a lenele'mo bati huto amuya lepito bihu komogetalo lenelepilenogo bite fa'mene mineba mineba minalana'mu yabe.

14 Ya hu'ehina ya'ma nalalu'nigita lugefa nasana faga faga lugefa nasanalo meminese hitetini eto hite minalo. 15 Lenali komopatini lenegekesa hiti'namo nehabe. Yamofihi kaga'a ya'ma lilugi lenalitini kehelite bu go fe lilo. 16 Konugu ya'ma bai nagami'i Kilisitou lusa gito molo'ehinamofihi ya'ma nonototi Kilisitohi golaha'a lusa gito molo'ehina ya'ma guna ito lilata nohune. To beleti lusa gito molo'ehina ya'ma nonototi Kilisitohi gufa'a lusa gito molo'ehina ya'ma guna ito lilata nohune. 17 Yupala nose'na ya'ma moneko'i nose'na lali asaga'i nolata nohune. Ana suhi luto lali asaga bona'i i hepito moneko'i lolo hulata nohune.

18 Lenali ya'ma Isilaeli bona'magi kumu kehelilo. Enali Hu'mamofitoga kuguhi keyete nose'na nelata nehana bona'magi mamufa gilata hitalo Hu'mamofitoga moneko'na hite i hepilata nehabe. 19 Kaga nolunamofihi hapa'a ma huto ni'ibe. Lugefa nasanamofihi seba'a nelata nehana nasana fa'menena ni'ibe. To lugefa nasana ai hiti fa'menena ni'ibe. 20 Hu'mamofihi mekeheli'ahana bona'magi enali seba'a nelata nehana ya'ma Hu'mamofi kumu meni'ibe. Sibi felemagihi seba'a nelata nehabe. Ya hu'ehina'mu nani'ni ya'ma lenali hiti sibi fele hiti i hepilana bati mehibe luto keheli'ohube. 21 Sipi Bomofihi konuguti nelete to sibi kene'magihi konuguti nelete hilana ya'ma kohi loeguti nolata'a meni'ibe. To Sipi Bomofihi hitaloti nelete sibi felemagihi hitaloti nalana'a meni'ibe. 22 Lali foipa felemagihi seba'a nonogomo Sipi Bomofihi ita bi laligi lali enohoka mehilune. Lali amuyatiuba ai'a ya'ma be meligi'ehibe.

23 Lenali ya'ma nasanalo asaga'i lilutamo ni'ibe lite lilata nehanaya silaga nasana lilenogoti ya nasanauba lele'mo bati mehilube'mu hibe. Ana'ina silaga'i liluta'a ni'ibe lilata nehanaya ya'ma nasana silaga'i lelito nobuto mono ka le'mo hetofa hiluta'a meni'ibe. 24 Yamofi kumu nani ma nolube, bo moneuba ai ai'na'ago yana'mu kaba huto mekehelise lalu'afi kumu hiti kehelino. Lenalalutinigihi enehe'mete hetofana hu epalalo.

25 Lenali ya'ma maketigati yaga nose'na mina fito nalune lite lilete mina fite nalo. Ya nehite faga faga lugefa nasanamofihi nonuguti ni'ifiye lite kehelinogo komopatini keta hinogo lebesi lalibe lite enoloka mehete fa'mene nalo. 26 Yamofihi mono bukugu fayahi ma lite keye'ahanamo ni'ibe:Metoga nasana silaga'i ni'ina yamofihi afo'afu Sipi Bo ai'a nohinagi lali asaga nose'na bati huto nalune'mu nohune.

27 To Hu'mamofihi kaga mekehelilata bo moneuba nose'namu elesa molo lepi'ehinogo ya'ma noha'agu tilune litemo tilanagihe. Tinogo nose'na lenubulo molo lepilenogo ya'ma lenegekesa kehelinogo komopatini keta mehinogo fa'mene nalabe. Fa'mene nelete felemagihi seba'a ni'ifihe lite loka mehe etalo. 28 Fa'mene nenenogo bo moneuba ya'ma yaga ya'ma lugefa nasanamofihi seba'a ni'ibe luto lu hokolo huto lu nelepinogomo ana bomofi kumu kehelinogo keta nehinogomo he'mite mo silo. 29 Lenalitini komopatini sibina hilina'a meni'ibe. Lenalalutinigihi komopa'ani sibina hu lalibe luto nolube. To nani komopa'ni keta menohigo henabe luto ai komopa'a keta nohinaguti kehelito'ni mo silune lite nelafiye? 30 To nani Hu'mamofihi fokehi holoto nose'na nalunamo ni'inaya, Hu'mamofihi fokehi holoto naluna nasana'mu moneuba nehabe luto keheli sibina nohibe lite nelafiye?

31 Nani lenali kalo nona'a ma luto nolube. Lenali nose'na nalune'mu nehitemo to yafi nagami'i nalune'mu to silaga'na hilune'mu Hu'mamofihi gi'a huto huto hilibe lite ya suhi lolo hilabe. 32 Lenali Yuta bona'i nehana to fegutoga bona'a nehana to Hu'mamofihi bona'a naga'i enali enubulo keheli sibina hi'ehilana nasana yamofihi li huto mehilo. 33 Nani ana suhi huto bona'i fato fato enali bu negenogo bati hilibe luto nohuto'ni nani'ni nasana'ni bati hilibe luto meni'ibe. Asaga bona'magi Hu'mau enubuto bise'na'a lilabe luto foya'a lito nominobe.